Wara dak kollu li nkiteb u ntqal fuq il-Via Sagra, iċ-ċimiterju, il-gradenzi ta’ fuq l-altar li kienu tnejn u saru waħda, issa mess ix-xorti lill-kwaranturi. Dawn isimhom magħhom, 40 siegħa, u minn dejjem kienu jitqassmu fuq numru ta’ ġranet. Hekk ġara dan l-aħħar ukoll, tqassmu fuq tlett ijiem iżda t-total ta’ sigħat ma kienx aktar 40! Forsi laħqu 15-il siegħa! Għaliex dan?

Riward il-Via Sagra għal ħabta ta’ Marzu kont smajt li l-Isqof waqqaf kummissjoni ta’ esperti. X’ġara s’issa? Din ġiet fin-Naxxar? Xi ħaġa smajt, li tawh xi ħasla lill-arċipriet qalu, iżda ħadd ma jaf xejn aktar. Allura miegħu biss tkellmu l-esperti?

Issa li l-festa qiegħda toqrob se nibqgħu bil-knisja vojta minn din l-opra ta’ preġju? Il-Via Sagra se tibqa’ mixħuta mal-art ġo kamra? Se nibqgħu bl-altari mkissrin, zukklaturi tistħu tħares lejhom?

U l-linef se jinxtegħlu din is-sena bħalma nxtegħlu fil-Milied?

Nispera li l-Via Sagra tit-waħħal fejn kienet u nitlob lill-arċipriet biex affarijiet li għamlu missirijietna jħallihom fejn huma bħalma jagħmlu kappillani oħrajn.

Naxxari, Naxxar