Waqt serata ddedikata għall-ħaddiema tal-Isptar Monte Carmeli, Angelo Mizzi ngħata l-premju l-Ħaddiem tas-Sena tal-istess sptar, filwaqt li t-tim tal-Psychiatric Outpatients ingħata l-premju t-Tim tas-Sena.

Angelo Mizzi li jokkupa l-kariga ta’ Senior Tradesman kien deskritt bħala persuna eżemplari u flessibbli ħafna fix-xogħol tiegħu. Preżentament jagħti s-servizzi tiegħu fis-Social Centre u fis-Psychiatric Unit tal-Isptar Mater Dei fejn juża wkoll il-ħiliet artistiċi tiegħu biex jgħin lil ta’ madwaru. Il-kollegi tiegħu kkumentaw li ħafna drabi jirnexxielu jiskopri talenti moħbija fl-individwi differenti li huwa jaħdem magħhom u jsib mod kif dawn jitużaw għall-ġid tal-isptar u l-missjoni tiegħu.

It-tim tal-Psychiatric OutPatients jiltaqa’ kuljum ma’ numru kbir ta’ persuni ġejjin minn kull strata tas-so.jetà. Il-membri ta’ dan it-tim kienu deskritti bħala effiċjenti ħafna fis-servizzi li jipprovdu filwaqt li jagħmlu dan b’mod professjonali u ferrieħi. Dan minkejja li l-membri tat-tim jaħdmu f’ċirkostanzi li kultant ikunu diffiċli minħabba n-natura tal-problemi li l-pazjenti tagħhom jiltaqgħu magħhom.

Din is-seba’ edizzjoni tal-Ħaddiem tas-Sena saret fil-pjazza ewlenija tal-Isptar Monte Carmeli.