Il-Ministeru għar-Riżorsi u l-Affarijiet Rurali kkonferma li r-rapport li kellu jlesti l-kumitat imwaqqaf apposta f’Awwissu tas-sena li għaddiet biex jindirizza l-bidla fil-klima għadu mhuwiex lest, u dan minkejja li kellu jitlesta sa Marzu li għadda.

Dan id-dewmien tqajjem mill-Kelliem Ewlieni Laburista għall-Ambjent, Żvilupp Sostenibbli u t-Bidla fil-Klima Leo Brincat meta lbieraħ fakkar kif kien il-Ministru George Pullicino stess li f’Awwissu li għadda waqqaf dan il-kumitat.

Iżda minkejja l-importanza nazzjonali ta’ rapport bħal dan, li permezz tiegħu pajjiżna jkun jista’ jkollu strateġija dwar kif għandu jadatta għall-effetti kollha tal-bidla fil-klima f’għadd ta’ oqsma, sal-lum, erba’ xhur wara, dan ir-rapport għadu ma tlestiex.

Waqt li kkonferma dan id-dewmien, il-Ministeru għar-Riżorsi u l-Affarijiet Rurali qal li r-rapport jinsab fl-aħħar tat-tlestija tiegħu.

B’reazzjoni għat-tħassib tal-Membru Parlamentari Leo Brincat, il-Ministeru qal li wieħed irid jifhem li dokument ta’ natura teknika bħal ma huwa dan, jista’ jdum ftit aktar milli mistenni biex jitlesta. Il-Ministeru qal fi stqarrija li dan ma sarx b’kapriċċ, iżda għax il-kumitat daħal fis-suġġetti varji b’mod aktar profond.

Huwa mistenni li meta jitlesta, id-dokument jinħareġ għall-konsultazzjoni pubblika qabel ma jitressaq ukoll għad-diskussjoni fil-Parlament.

Madankollu, ma ta ebda data indikattiva meta se jkun ippubblikat ir-rapport. Wisq inqas ma ntqal meta se ssir id-diskussjoni dwaru fil-Parlament.

Il-Ministeru fl-istqarrija tiegħu, fl-ebda ħin ma rreaġixxa għas-suġġeriment ta’ Leo Brincat li ġaladarba jkun approvat ir-rapport, għandu jiddaħħal mekkaniżmu ta’ benchmarking biex ikunu jistgħu jitkejlu u jsir monitoraġġ tal-miżuri tal-implimentazzjoni tiegħu.