Proposta tal-Kamra tal-Periti biex jitwaqqfu dawk li jissejħu Design Review Panels, biex jevalwaw id-disinji proposti għal ċerti proġetti u binjiet, ma ntlaqgħux mill-Awtorità tal-Ambjent u l-Ippjanar (MEPA).

Informazzjoni li għandha t-TORĊA tgħid li dawn id-Design Review Panels ma kinux inklużi bħala parti mir-riforma tal-MEPA għax kienet biss il-Kamra tal-Periti (KTP) li għamlet din il-proposta.

Dan il-fatt kien interpretat mill-ogħla uffiċjali fil-MEPA, li m’hemmx ħtieġa għalihom.

Fis-snin sebgħin kien jeżisti Bord tal-Estetika, iżda l-Perit Vince Cassar, li jmexxi l-KTP jispjega li dak li qed ikun propost illum huwa xi ħaġa totalment differenti.

“Il-Kamra tal-Periti mhix favur li jerġa’ jitwaqqaf il-Bord tal-Estetika għas-sempliċi raġuni li l-arkitettura ma tistax taġġudikaha fuq l-estetika biss. Meta nitkellmu fuq l-estetika inkunu qegħdin nifmu kif tidher il-faċċata jew faċċati ta’ bini partikolari - jekk it-twieqi humiex kwadri jew rettangolari, jekk il-gallarija għandiex ikollha balavostri jew ħadid. Dan huwa dak li kien jara l-Bord tal-Estetika,” jgħid Cassar filwaqt li jispjega dak li qed ikun propost.

“Aħna qegħdin immorru pass ieħor ’il quddiem għax jidhrilna li biex ikollna arki-tettura ta’ kwalità irid ikollna viżjoni aktar ħolistika, li tħares u tara kif bini jintegra jew le fl-ambjent ta’ madwaru. Kif l-istess bini se jeffettwa tajjeb jew ħażin l-ambjent ta’ madwaru. Kif se jaffettwa s-sistema ta’ trasport tal-in-ħawi; kif se jibdel il-ħajja tar-residenti ta’ madwar.

“Aħna għamilna proposta li għandu jkun hemm Design Review Panels magħmula minn membri mill-Kamra tal-Periti, minn membri minn NGOs li jaħdmu f’dan il-qasam u minn membri fil-qasam tan-negozju,” jargumenta Cassar.

Huwa jgħid li dawn il-Pa-

nels għandhom ikunu indipen-denti u barra mill-istruttura tal-MEPA.

“Proġetti ta’ ċerta entità u ta’ natura pubblika jew privata, inklużi proġetti tal-gvern, għandhom ikunu sottomessi għand dawn il-Panels qabel ma jitressqu quddiem il-MEPA biex tkun tista’ ssir evalwazzjoni u diskussjoni pubblika dwarhom.

“Wara din id-diskussjoni pubblika il-membri tal-Panels jkunu jistgħu jagħmlu rapport fuq il-proġett, liema rapport għandu jkollu suġġerimenti u kritika biex l-iżviluppatur jkun jista’ jtejjeb id-disinn tiegħu. Tali diskussjoni għandha wkoll tidħol fid-disinn u l-ambjent tal-bini minn ġewwa u mhux biss minn barra. Aħna nħossu li hekk biss jista’ jkollna titjib fil-kwalità tal-arkitettura u tal-ambjent li ngħixu fih,” żied jgħid Cassar.

Dwar dan kiteb ukoll il-Perit Conrad Thake, li jgħallem fil-fakultà tal-arkitettura fl-Università ta’ Malta.

“Il-bżonn urġenti li jkun hemm design review board kompost minn persuni kwali-fikati u speċjalisti waqa’ fuq widnejn torox. Bħalma ġara fil-passat jistà jkollok proġetti li jissodisfaw dak kollu mitlub mill-proċess tal-ippjanar imbagħad ifallu fejn jidħol disinn u ma jikkontribwixxu xejn lejn il-kwalità tal-ħajja tal-komunità,” kiteb Thake, fil-magazine ‘The Architect’.

aleander@unionprint.com.mt