Minkejja li għaddiet ġimgħa minn meta żvelajna li mijiet ta’ glalen tad-drenaġġ, mill-impjant tad-drenaġġ f’Taċ-Ċumnija, limiti tal-Mellieħa, kienu qegħdin jispiċċaw fil-baħar, il-problema baqgħet ma ssolvietx.

Dan wassal biex dawk li fi tmiem il-ġimgħa marru jgħumu fil-bajja tal-Għadira reġgħu kellhom jissaportu rwejjaħ xejn sbieħ, filwaqt li kienu ħafna li esprimew il-biża’ li kien hemm xi ħaġa fil-baħar tal-Għadira.

Il-baħar, li qiegħed ftit mijiet ta’ metri l-bogħod, ma’ waħda mill-isbaħ kosti f’pajjiżna, huwa mifqugħ bid-drenaġġ.

U din mhix l-ewwel darba!

L-impjant li sewa €9 miljuni falla mill-għan tiegħu, li jsaffi l-ilma qabel jispiċċa fil-baħar, diversi drabi.

Ikkuntatjat minn din il-gazzetta, is-Sindku tal-Mellieħa Robert Cutajar qal li għandu l-kelma li din il-problema se tissolva fil-jiem li ġejjin.

“Li ġara, almenu kif qalu lili mill-Water Services, kien hemm ħsara simili fuq l-istess biċċa apparat u ovvjament riedu jġibu l-ispare parts peress li għal kull biċċa apparat li kien hemm kellhom spare parts waħda. Marru tnejn u nqabdu fuq sieq waħda,” qal Cutajar.

Dwar it-tħassib tan-nies Cutajar sostna li l-ilma tal-Għadira huwa ta’ kwalità tajba. Spjega li dan qed ikun ittestjat minħabba l-applikazzjoni tal-’blue flag’.