Il-kanzunetta My Dream kantata minn Thea Garrett se tirrappreżenta lil Malta fil-Eurovision Song Contest wara li rebħet il-Go Malta Euro Song b’54 vot mill-ġurija u 48 vot kif kalkulat mit-televoting btotal ta’ 102 voti. Il-kanzunetta għandha lirika ta’ Sunny Aquilina u kompożizzjoni ta’ Jason Cassar. Biex Malta tkun tista’ tieħu sehem fil-finali tal-Eurovision Song Festival, li din is-sena se jsir fil-kapitali Norveġiża, Oslo, l-ewwel trid tgħaddi mill-fażi tas-semi finali li se ssir fil-25 ta’ Mejju.

Malta se tkun rappreżentata fid-disa’ post. Is-serata l-oħra tas-semi finali ssir jumejn wara u l-qofol tal-festival jintlaħaq is-Sibt 29 ta’ Mejju, bis-sehem ta’ 39 kanzunetta fil-fażi finali.

Bħas-soltu l-kontroversji fil-Go Malta Euro Song ma naqsux, fejn matul il-ġimgħa nqalgħu diversi ntoppi. L-Union tal-Kompożituri, Kantanti, Awturi u Mużiċisti Maltin (UKAM) qalet li jiddispjaċiha tara li min deher li ma kienx konformi mar-regolamenti indikati, spiċċa jilgħabha tal-vittma u mingħalih li qed jieħu vantaġġ mis-sitwazzjoni. L-UKAM qalet dan b’riferenza għall-kwistjoni li nqalgħet matul il-provi ta’ nhar il-Ħamis fil-għodu, fejn il-maġġoranza tal-kompożituri, awturi u kantanti ħarġu ‘l barra minn taħt it-tinda bi protesta minħabba li kien hemm min ma żammx ma’ numru ta’ regolamenti.