Fid-diskors tiegħu Victor Carachi qal li l-gazzetta it-TORĊA hija l-prodott ta’ żmienha, ta’ kuntest fejn l-isfida tal-ħaddiem għall-kisba ta’ drittijietu kie-net bdiet tieħu l-milja tagħha immedjatament wara t-tmiem tat-Tieni Gwerra Dinjija. Kienet mixja twila dik mibdija mill-GWU, fil-5 ta’ Ottubru 1943 u li tkompliet minn The Torch fis-sena ta’ wara. Kienet propju l-ħtieġa ta’ din il-mixja li wasslet biex fil-25 ta’ Ottubru 1959 The Torch ħadet il-libsa l-ġdida ta’ it-TORĊA, qal Carachi.
Huwa qal li it-TORĊA kienet l-ew-wel Sunday paper f’kull sens tal-kelma li kienet Maltija. Ma kienx hawn biss li t-TORĊA saret parti mill-istorja ta’ pajjiżna. It-TORĊA kienet għal żmien twil l-unika vuċi konsistenti tal-movi-ment trejdunjonistiku f’Malta, imma kienet ukoll, u għadha, vuċi kulturali ta’ pajjiżna.
Il-President tal-GWU qal li: “bħala GWU nagħtu bosta importanza lill-qasam kulturali. Bħala union ġenerali tal-ħaddiema, huwa dmir tagħna li nħarsu lejn il-ħaddiem bħala persuna, b’mod ħolistiku.” Carachi qal li: ma nistgħux, jekk tassew irridu nirrappreżentaw tajjeb lill-ħaddiema membri tagħna, nifirdu lill-ħaddiem mill-ħajja tiegħu barra mid-dinja tax-xogħol. Il-ħaddiema huma ukoll aġenti kulturali. Dan l-impenn kulturali tal-ħaddiema mhux biss jgħollihom ‘il fuq fost is-soċjetŕ Maltija, imma ukoll jagħti valur akbar lill-klassi li ġejjin minnha. Huwa xiehda li l-klassi ħaddemija hija tassew ix-xewka ta’ dahar dan il-pajjiż.”
Fl-aħħarnett Victor Carachi feraħ lil dawk kollha li ħadu sehem u lil dawk li organizzaw dan il-konkors fosthom lill-eks-President tal-GWU, Salv Sammut.
Waqt l-istess serata tkellem ukoll Alfred Massa mill-Għaqda Poeti Maltin li sellem lil dawk li mexxew il-paġni letterarji ta’ din il-gazzetta fosthom il-mibki Karmenu Ellul Galea, lil Mario Bezzina, Charles Flores u Francis Galea li kollha ħadmu u stinkaw biex wasslu lill-qarrejja materjal utli, li ċertament tefa’ dawl leqqien fuq il-mixja letterarja f’pajjiżna matul l-aħħar 50 sena. Pawlu Mizzi, mill-Klabb Kotba Maltin, semma r-rabta bejn it-TORĊA u l-mixja storika ta’ pajjiżna u qabbel kif il-Klabb, il-GWU u t-TORĊA dejjem imxew ’il quddiem b’identitŕ Maltija b’mod speċjali fl-użu tal-ilsien Malti.
Ir-rebbieħa tal-konkors letterarju fl-okkażjoni tal-50 Anniversarju tat-TOR-ĊA huma: Konkors ta’ Proża - L-ewwel post Emmanuel Psaila bin-novella ‘Ġorġ Kanġi’. Fit-tieni post Charles Casha bin-novella ‘Agħti Mulej, il-Mis-trieħ ta’ Dejjem’ u fit-tielet post Claudine Camilleri bin-novella ‘Lucy’.
Konkors ta’ Poeżija - L-ewwel post Stefano Farrugia bil-poeżija ‘Eliżir ta’ Mħabba Qalbiena’. Fit-tieni post ukoll Stefano Farrugia bil-poeżija ‘Solitarja Moribonda’ u fit-tielet post Charles Casha bil-poeżija ‘Li Kieku Nista’.
Waqt din is-serata saru intervalli mużikali mill-kantant folk Walter Mi-callef fuq il-kitarra tiegħu filwaqt li s-serata tmexxiet minn Charles Magro.
Fost dawk preżenti kien hemm ukoll uffiċjali tal-GWU fosthom il-Viċi President Edmond Cefai, l-Editur tat-TORĊA Aleks Farrugia, diriġenti tal-Union Print u l-Kap tal-Pubblikazzjonijiet tal-Union Print Frans Ghirxi.
Fil-ħarġa tal-ġimgħa d-dieħla t-TORĊA se tiddedika l-paġni tan-nofs għal ritratti minn din is-serata, filwaqt li x-xogħlijiet rebbieħa se jkunu ppubblikati fuq it-TORĊA fil-ħarġiet li jmiss. Ktejjeb b’edizzjoni limitata, li jiġbor fih diskorsi u x-xogħlijiet rebbieħa se jkun mibjugħ fil-ġimgħat li ġejjin.
pisani.journalist@gmail.com
|
